Klasifikashon pa bukinan informativo: Siso

Den nos biblioteka nos ta klasifiká bukinan informativo ku e sistema Siso. Siso ta para pa Schema voor de Indeling van de Systematische catalogus in Openbare bibliotheken, ku otro palabra un skema pa klasifiká e katalòk sistemátiko den bibliotekanan públiko. Ku e sistema aki hopi biblioteka na Ulanda tambe ta traha. Tantu esnan públiko komo esnan di enseñansa superior i universitario.
E sistema Siso ta universal i e ta purba inkluí tur konosementu di e ser humano, di manera ku material tokante tur tópiko por wòrdu klasifiká. E base di Siso ta e áreanan sientífiko.

Aki ta sigui e rúbrikanan prinsipal di Siso, a base di kua bo por sigui buska i haña bo kaminda den biblioteka mas fásil. E ta fasilitá bo búskeda, pasó si bo ta gusta lesa tokante sikologia, bo sa den kua rúbrika bo por haña tipo di buki asina, di manera ku bo no mester konosé ni título, ni outor pa bo por buska.