E parti aki di nos site ta kontené informashon tokante tur loke biblioteka tin pa ofresé abo ku ta studiando. Lesa mas tokante nos sekshon pa Hóben i Adulto, nos Youth Station, nos sala di estudio i nos sekshon Antilliana/ Caribiana, kaminda bo por akudí pa tur informashon tokante temanan relatá na Kòrsou, Antia i Karibe. Den e rúbrika aki lo bo haña tambe nos kalènder di aktividat pa hóbennan i un splikashon tokante Kon pa buska den kashi informativo? No lubidá di chèk kiko bùs di buki tin pa ofresé.

Sekshon pa Hóben i Adulto
Sekshon pa Hóben i Adulto ta situá den biblioteka sentral. Mester tin mínimo 14 aña pa fia den e sekshon aki.

E kolekshon ta konsistí di:

Buki pa èksamen
Nos tin un kantidat grandi di buki pa èksamen na Hulandes i algun na Ingles i Spañó. E kolekshon di buki pa èksamen na franses ta un poko mas limitá. Tambe nos tin tantu buki informativo komo buki rekreativo, na papiamentu, ulandes, ingles, spañó i franses. Nos tin ademas un kolekshon Antilliana ku novela i tópiko relatá na Antia.

Reseña i resúmen di literatura
Tin un kantidat amplio di reseña i resúmen di literatura na ulandes, ingles, i un kantidat ménos ekstenso, di literatura spañó, aleman i franses. Pa konsultá esnan na ulandes bo por hasi uzo di buki na nos bali di informashon òf e CD-Rom (‘Uittrekselbank i fictierom) ku ta instalá riba tur nos kòmpiuternan den e sekshon aki. Pa buki di reseña i resúmen na otro idioma, bo puntra na nos bali di informashon.

Map di dokumentashon digital
Riba tur kòmpiuter den nos sekshon tin un CD-Rom instalá ku ta kontené mapnan di dokumentashon temátiko. Hasi uzo di nan pa proyekto relatá na skol i bo estudio òf si bo tin interes pa un tópiko spesial. Tópikonan hopi konsultá ta: polushon, droga, malesanan venériko, kriminalidat, embaraso hubenil, alkohòl, entre otro.

Material oudiovisual
Nos tin vidio informativo i rekreativo ku bo por fia pa disfrutá di dje na kas. Promé ku bo bai ku esakinan kas, bo por wak nan na nos bali di informashon. Pronto nos lo tin DVD!

Ademas...plenchi di kòmpiuter
Aki bo por sùrf riba Internèt, manda e-mail òf taip un teksto. Tur esaki ta grátis! Pa un suma chikí bo por prent i tur mèrdia for di 2or te ku 5’or tin un studiante pa guiabo riba kòmpiuter i Internet.

Nos ta disponé tambe di un aparato pa saka kopia, den kaso ku bo no por òf ke bai ku sierto material.

Bali di informashon
Na nos bali di informashon nos por yudabo buska buki òf buska informashon ku bo mester pa proyektonan di skol òf pa interes personal. Tambe bo por haña material pa konsulta rápido manera entre otro dikshonario i ensiklopedia.
Pidi ayudo, nos tei pa guiabo!

Studia den grupo
Sekshon pa Hóben i adulto tin diferente mesa i stul, repartí den e sekshon ku ta dunabo e oportunidat pa sinta studia den grupo. Pa studia individualmente i den silensio bo por akudí na sala di estudio.

NOS TA SPERA BO DEN SEKSHON PA HOBEN I ADULTO!

Resúmen Sekshon Hóben i adulto
Lugá : biblioteka sentral na Skalo
Orario : klek aki
Material : buki, reseña i resúmen di literatura, map di dokumentashon digital, vidio
Ademas... : traha tarea di kas, saka kopia, sùrf riba Internèt, studia den grupo, bali di
informashon.
Bira miembro : klek aki
Tarifa i preis : klek aki
Reglamento : klek ak