Historia
Biblioteka Públiko a keda instituí na aña 1922 komo parti di e servisio di “Enseñansa i Kultura”. E kolekshon tabata konsistí e tempu ei di kolekshonnan di diferente biblioteka chikitu riba e isla i di donashonnan i kolekshonnan lokal privá.
Promé ku Biblioteka a bira un servisio riba su mes na aña 1973, ya kaba na 1945 nos tabata ubiká den un edifisio separá. E edifisio aki tabata konosí den boka di pueblo komo “Leeszaal di Pietermaai”. Algun departamento, manera entre otro Biblioteka Hubenil, a keda ubiká na Brionplein Otrobanda.
Na aña 1988 tur nos servisionan di Pietermaai i Otrobanda a muda pa nos edifisio nobo na Skalo, un edifisio muchu mas grandi ku a pèrmití nos ekspandé nos servisionan.
Na desèmber 1997 Biblioteka Públiko a transformá di servisio di gobièrnu pa un fundashon. Te ku awor nos ta e úniko biblioteka públiko di Kòrsou.

Mishon
E mishon di Fundashon Biblioteka Públiko Kòrsou ta pa informá, den e sentido mas amplio di palabra, personanan i organisashonnan. Pa logra esaki FBPK ta stimulá aktivamente aksesibilidat na informashon lokal i general. Nos meta ta pa ofresé e informashon aki segun nesesidatnan i posibilidatnan di nos diferente gruponan di enfoke. Ademas di esaki, nos biblioteka mester ehersé un funshon kultural, edukativo, rekreativo i sosial di sumo importansia.

Vishon
Biblioteka Públiko ke ta e sentro di informashon di mas avansá na Kòrsou. Nos ta boga pa nos ta e instituto sentral na Kòrsou pa buska, elaborá, warda i duna informashon pa medio di tur sorto di medionan di komunikashon,ku asento riba servisio na kliente, trabou na midí i efisiensia.
Nos ta trata di hasi esaki dor di:

• Stimulá uzo di informashon
• Duna informashon
• Kontribuí na formashon kultural i sosial
• Mantené nos kolekshon nashonal

Banda di e motibunan ariba menshoná nos ta trata di hasi esaki dor di ta un biblioteka aksesibel, den tur sentido di palabra pa un i tur, pasombra nos ta kere ku un sentro di informashon mester ta públiko.