Biblioteka Públiko na Skarlo
E Biblioteka na Skarlo ta e edifisio prinsipal di Fundashon Biblioteka Públiko Kòrsou
E biblioteka tin tambe un filial na Barber i 2 bùs di buki ku ta bishitá 33 bario.

Lesa i fia
Biblioteka ta un espasio públiko. Tin buki, revista, korant, obra di konsulta , vidio i kurso di idioma. Uso di tur e materialnan akí di biblioteka ta grátis, pero si bo ke bai kas ku buki,vidio òf otro material, bo mester laga inskribíbo komo miembro.
Pa konsulta di algun material bo mester di sédula/identifikashon.

Inskripshon i membresia
Pa fia buki bo tin mester di un pas válido di biblioteka. E pas ta grátis te ku 17 aña. Hóbennan te ku 24 aña i esnan di 60 plùs ta haña rebaho.
Turista/stazjèr ku ta permanesé temporalmente riba nos isla ta paga pa membresia i un depósito pa persona.
E pas di biblioteka ta personal. Bo ta responsabel pa e material ku bo fia na bo nòmber. E pas di biblioteka ta válido pa un aña, eksepto ku bo ta bin kai den e periodo akí, den un otro kategoria di edat. E ora ei e pas ta válido te ku bo próksimo hasimentu di aña.
Si bo pèrdè òf sinti falta di bo pas di biblioteka, ta di sumo importansia pa bo mèldu esaki mesora na biblioteka, di moda ku un terser persona no por hasi mal uso di dje. Bo ta risibí duplikat di un pas kontra pago i na momentu ku bo mustra bo tarheta di identidat. Bo mester duna nòmber i kambio di adrès na tempu.
Membresia ta finalisá riba e fecha ku e ta vense, ku fayesimento i ku kanselashon por eskrito òf oral di esun ku ta fia material. Ku kanselashon promé ku ora, no ta duna kontribushon bèk.

Identifikashon
Ta suministrá un pas di biblioteka solamente ora tin identifikashon di persona i adrès.
Mucha te ku 13 aña mester laga nan mayor òf tutor inskribí nan ku identifikashon di persona i adrès.

Prueba aseptá di identifikashon:
• Reibeweis di Kòrsou + identifikashon di adrès
• Reibeweis di Ulanda + identifikashon di adrès
• Pas di skol + identifikashon di adrès
• Pas di identifikashon antiano + identifikashon di adrès
• Pasport ulandes+ identifikashon di adrès
• Pasport no-ulandes, ku pèrmit di estadia registrá pa inmigrashon den e pasport.

Pa identifikashon di adrès ta aseptá: kopia di banko òf giro/ sertifikado di kranshi, kòntrakt di hür/ karchi di SVB / resibu di Aqualectra/ resibu di UTS. Pa tur prueba di identifikashon ta konta ku nan mester ta resien(no mas bieu ku 2 luna)

Pas pa fia i fiamentu di material
Bo por fia material únikamente ku un pas válido di biblioteka.
Bo pas di biblioteka ta dunabo derechi pa bo fia na biblioteka sentral. Pa bo fia na e bùs òf e filial bo mester inskribíbo ei nan mes. No ta fia material di sala di estudio, sala di korant, ni di e sekshon Antilliana/Caribiana.
Miembro hóben te ku 13 aña por fia únikamente material den sekshon hubenil.
Ora bo laga registrá buki òf otro material na e bali pa fia buki, bo ta haña un bòn. Riba e bòn akí tin e datonan di mas importante di e material, manera p.e. e eskritor i/òf título. Na kada título ta menshoná a la bes e último fecha pa tresé bèk .

Entrega i plaka pa buki-lat
Bo por entregá material fiá tantu na biblioteka komo na bùs di buki den bario.
Na biblioteka Skarlo bo ta haña un bòn komo prueba ku bo a entregá e materialnan. Si bo entregá material ku bo a fia lat bo mester paga plaka pa buki-lat.
Ta kalkulá esaki pa dia. Ta start un proseso di kobransa si bo no a entregá material ku bo a fia despues di tres atvertensia. Tur gastu hasí ta bin na bo kuenta.

Servisio èkstra via di buzon di buki
Pa evitá para den rei i warda bo por hasi 24 ora pa dia uso di e buzon di buki.
Ta prosesá material entregá e mesun dia. Plaka di buki-lat ku bo por ta debe eventualmente si bo mester deskontá na bali pa fia buki. Esaki por sosodé tambe na un siguiente bishita.

Material ku a daña
Biblioteka ta sali for di e punto di bista ku bo ta trata e material ku bo fia, ku kuidou.
Paga bon tinu pa e material ku bo ke fia ta den bon kondishon. Si bo deskubrí kualke daño na e material, mèldu esaki na e bali kaminda ta fia. Bo ta evitá asina’kí ku por ponebu despues responsabel pa e daño huntu ku gastu ku por bin aserka.
No purba drecha e daño bo mes, pero pone biblioteka na altura.
Si bo a pèrdè òf daña e material ireparabelmente bo mester kompensá balor kompleto ku e material ta kosta ora e ta nobo. Pa vidio esaki ta un suma fiho. Si ta trata di material ku por drecha ta kobrabo gastu di reparashon ( esaki tambe ta un suma fiho)
Biblioteka ta pidi tambe un kompensashon pa un ‘barcodesticker’ ku a daña.
Rewind vidioteip despues di uso. Por pasa vidio di biblioteka solamente den sírkulo di kas òf por usa nan pa meta edukativo. Ta prohibí eksplísitamente presentashon públiko òf kopia.

Kantidat di material ku ta fia

Término pa fia

Prolongá término pa fia
Por prolongá e término pa fia buki i vidio.
Bo por prolongá kurso di idioma solamente un biaha.
Tene kuenta ku prolongashon ta konta komo un fiansa nobo.
Bo no por prolongá e material si un otro hende a reservá e material konserní.
Bo por prolongá maksimalmente dos biaha na telefòn durante ora ku biblioteka ta habrí.

Petishon/Reservashon
Si e material ku bo reservá no ta disponibel, bo por pidié/reserv’é. Bo por laga hasi esaki via di bali di info òf bo mes por hasié via e katálogo outomatisá. Bo por haña mas informashon tokante esaki na bali di info. Bo por reservá tambe via telefòn durante ora ku biblioteka ta habrí. Ta notifikábo ora e material deseá yega òf ku no tiné. Bo tin ku paga gastu di reservashon ora bin buska e material.

Responsabilidat
Biblioteka no ta responsabel pa propiedat di persona ku keda’tras den e material ku el a fia. Biblioteka no ta responsabel pa eventual daño hasí na bo aparato di vidio, kousá pa vidio ku a fia na biblioteka.
Biblioteka no ta responsabel pa ladronisia/pèrdida den su edifisio.

Otro stipulashon
No ta pèrmití uso di telefòn selular den sala di estudio i Antilliana/Caribiana
Ta permití kome i bebe (no kuminda kayente ni bibida alkohóliko) solamente den e sala abou di korant. Humamentu ta prohibí.
Material di biblioteka ta protehá kontra di ladronisia.
Ta hasi denunsia di ladronisia. ‘Bewakernan’ di biblioteka ta outorisá pa tira bista si tur hende ta tene nan mes na regla.
Bo por depositá bo idea i remarkenan riba formularionan ku ta imprimí di antemano, den e buzon di idea na e piso abou.

Den tur otro kaso ku no ta menshoná den e reglamentu akí, desishon ta keda den man di gerensia.
Pa Fundashon Biblioteka Públiko ta konta tambe e reglanan manera deskribí den e reglamentu di bishitante. Tur dos ta obligatorio pa tur bishitante i esnan ku ta fia material.