E parti aki di nos site ta kontené informashon tokante nos sekshon hubenil, e kalènder di aktividat pa tur mucha, i un página ku tópikonan interesante pa bo! Ademas e ta duna un splikashon chikitu di loke bùs di buki tin pa bo.

Sekshon Hubenil
Nos sekshon hubenil ta situá riba e promé piso di nos biblioteka sentral na Skalo. Akinan tur mucha for di dos aña di edat ta bon biní. Nos tin un kolekshon di buki (na papiamentu, ulandes i algun na ingles i spañó), revista, vidio (ku bo por fia for di 14 aña) i algun strep, por ehèmpel ‘Suske en Wiske’, ku bo por fia. Nos tin material pa mucha di tur edat, pero ora bo hasi 14 aña bo por kuminsá fia na e departamento pa hóben i adulto tambe.
Tambe nos tin vidio pa mucha, pero pa fia esakinan bo mester bini ku un adulto ku ta miembro pa e por fia nan pa bo. Si e no ta miembro e por bira miembro semper.
Bo por fia 3 material pa bai kas ku n’e kada bes ku bo bin. Bo por keda ku e materialnan aki, sea buki, revista òf strep, 3 siman. Si e 3 simannan pasa i ainda bo no ta kla, bo por bolbe fia nan, solamente si niun hende no a reservá esun ku bo ke fia. Si bo ke fia vidio, bo mester laga un hende grandi hasi esaki pa bo.
Aparte di fia material, bo por bini na sekshon hubenil pa bo por traha tarea di kas, sinta pinta, wak programa pa mucha na televishon i hunga riba kòmpiuter. Nos tin diferente wega edukativo ku bo por skohe for di dje.
Nos ta organisá tambe aktividat pa mucha tur djabièrnè atardi.

Mayor i edukador
Nos tin un kolekshon spesial pa mayor i edukador, ku ta inkluí buki tokante diferente tema interesante ku tin di haber ku edukashon di mucha.

Bali di informashon
Algu hopi importante pa bo sa ta ku den nos sekshon hubenil tin un bali di informashon. Akinan nos por yudabo buska buki òf buska informashon ku bo mester pa un tarea di skol òf pa interes personal. Tin vários map di dokumentashon ku hopi tópiko interesante pa bo charla na skol, manera: hopi sorto di bestia, vários pais, temblor, volkan, djente i hooopi mas.
E mapnan aki mester tei semper pa tur mucha por wak den nan, p’esei nos no ta fia nan, pero bo por saka kopia den nos sekshon mes. Nos ta buska informashon riba Internèt tambe.

Huki di kòmpiuter
Den nos sekshon hubenil tin un huki di kòmpiuter kaminda bo por hunga hopi wega edukativo i dibertido. Tur atardi tin un guia pa siñabo kon anda ku kòmpiuter.

NOS TA SPERA BO DEN SEKSHON HUBENIL

Resúmen Sekshon Hubenil
Lugá : promé piso biblioteka sentral na Skalo
Orario : klek aki
Material : buki, revista, strep, map di dokumentashon, vidio
Ademas... : traha tarea di kas, pinta, wak televishon, hunga wega riba kòmpiuter i
hopi otro aktividat.
Bira miembro : klek aki
Tarifa i preis : klek aki
Reglamento : klek aki