| Notisia i Partisipashon |
Bo ke dibertí konose mundu di kuenta di ada? 17-07-2009
Partisipà na e
PROGRAMA DI LESA DEN FAKANSI
di Biblioteka Pobliko Korsou.
di 7 pa 29 di yüli 2009
ku chèns pa gana 3 premio atraktivo:
promé premio un LAPTOP
i dos premio mas di sorpresa !
Pa partisipá bo mester tin 8 pa 12 aña i
bo mester lesa 15 kuenta di ada na ulandes
i kontestá un formulario di pregunta.
Pasa buska bo kuentanan pa lesa
for di djamars 7 di yüli na biblioteka na Skalo
òf bús di buki den bo bario.
Por entrega formulario yená na biblioteka na Skalo
te ku 29 di yüli.
Djabiérné 31 di yüli: fiesta di klousura
for di 3'or pa tur mucha ku a partisipá
i entrega di premio na biblioteka na Skalo.
LESA,DIBERTI I GANA PREMIO DEN FAKANSI ! |
Trese buki bèk na tempu ke men ..... 03-06-2009
Pa stimulá klientenan di Bùs di buki pa trese buki bèk na tempu, Fundashon Biblioteka Públiko Kòrsou, ta introdusí entrante 1 di yüni 2009
KARCHI di SPAR
Reglanan
1. Kada miembro ta risibi 1 karchi di spar
2. Pa kada buki/revista entregá na tempu, e miembro ta risibi un stèmpel riba e karchi
3. Si pa kualke motibu, Bùs di buki no por a bai bario riba e fecha indiká, e siguiente biaha ku Bùs bin, ta konsiderá e entrega komo na tempu. E miembro ta risibi su stèmpel normal.
4. Mucha ta risibi un regalito despues di kada banda di karchi yená.
5. Adulto for di 18 aña ta risibi un regalito despues di 1 karchi i mei yená.
6. Miembronan por entregá buki na kualke parada di Bùs di buki
7. Solamente pa bukinan entregá na tempu den Bùs di buki mes ta haña stèmpel. Pa motibu atministrativo, buki entregá na Skaló, no ta kai bou di e kampaña di Karchi di spar.
8. Den kaso di pèrdida di e karchi di spar, e miembro por haña un karchi nobo pero e konteo ta kuminsá di nobo, pues e miembro no tin derecho mas riba e stèmpelnan kumulá, ku a pèrdè.
9. Ora e miembro lubidá di bin Bùs di buki ku su karchi di spar, e Kolaborador di Bùs di buki ta hasi un anotashon riba su karchi di miembresía pa siguiente biaha e por risibi su stèmpelnan.
Fundashon Biblioteka Públiko Kòrsou ta spera ku e kampaña aki lo konsientisá nos klientenan di e importansha di trese buki bèk na tempu pa skapa kliente mes di gastu inesesario, pa Biblioteka por uza e tempu balioso di atministrashon di rekòdatorio mas fruktífero i pa otro miembro tambe por fia e buki òf revista dushi ei!
Masha masha danki pa koperashon!
Kòrsou, 1 di yüni 2009 |
Fia DVD na biblioteka 28-11-2008
Entrante promé di dezèmber tur miembro di Biblioteka na Skalo por fia DVD. Mucha komo hende grandi por disfrutá di e kolekshon variá di DVD ku biblioteka ta ofresé, un kolekshon úniko na Kòrsou. Pa mucha tin por ehèmpel cartoons, DVD pa siña konta, lesa i pelíkula basá riba buki.
Pa hende grandi tin DVD di ehersisio, dokumental tokante paisnan, pelíkula klásiko i basá riba buki, arte, flora, founa, kas real, talkshows i muchu mas.
E gastunan pa fia un DVD ta Nafl 3,-pa un. Tur miembro por fia un máksimo 2 DVD kada biaha pa un periodo di 3 siman. Si ta deseá por prolongá e tèrmino di fia tambe.
Por haña un bista kompletu di e títulonan ku tin den e kolekshon riba e wèpsait di biblioteka, www.bibliotekapubliko.an. Skohe nos katálogo i buska riba onderwerp DVD. Den e lista ku sali por klek riba e kolekshon ku bo ta deseá di haña sa mas di dje.
Probechá i buska bo DVD na Bo biblioteka. |
Ata’kí algun tep pa fasilitá abo komo mayor! 08-03-2007
I no lubidá ku na biblioteka bo por haña tradukshon di buki na Papiamentu, pa bo lesa pa bo chikitin.
1. Laga bo yu ripará ku bo ta haña lesamentu importante i lanta amor pa buki serka dje.
2. Kuminsá ku buki ku bo yu fo’i chikí, kont’é kuenta di kosnan ku a pasa kuné durante dia.
3. Hasi bo yu miembro di biblioteka e ta grátis pa tur mucha for di 2 aña. Bo por bira miembro na bùs di buki ku ta bai 35 bario, nos filial na Barber òf biblioteka na Skalo.
4. Hinka lesamentu ku bo yu den rutina di tur dia maske ta algun minüt òf hasié un spèshel den wikènt.
5. Skohe e momentu adekuá di dia òf siman pa e ratu di lesa ta dushi i relahá; un interkambio íntimo den kua bo yu ta haña tur atenshon i ku ta stimulá komunikashon entre bosnan.
6. Animá yunan mayó pa lesa p’e chikitinnan i animá welanan pa konta historia di ‘ten nan ten’.
7. Lesa bo tambe, no ta importá kiko: buki, revista, korant òf foyeto, lo bo ser un bon ehèmpel pa bo chikitin, ku lo imitá bo. Abo ta sirbi komo e mihó ehèmpel.
8. Rekompensá bo yu ku un kuenta òf buki, e ta dun’é balor pa buki. En bes di dun’é un ko’i smak, malkri’é ku un kuenta òf un buki.
9. Regalá bo yu un buki na okashon di dianan speshal manera pa su aña, San Nikolas òf bou di palu di Pasku.
10. Skohe buki, revista tokante tópiko ku ta interesá bo yu i pidi ayudo i konseho na biblioteka òf bùs di buki.
11. Partisipá na aktividatnan tokante buki i literatura. Regularmente biblioteka tin kontamentu di kuenta i algun bia pa aña un mainta dibertido pa mayor di tur chikitin ku a inskribí.
12. Biblioteka ta ofresé buki di prenchi tradusí na Papiamentu pa bo chikitin.
13. Kòrda ku pa bo chikitin no ta nada ku un buki no ta na Papiamentu, e ta konsentrá mas tantu riba plachi i siña palabra nobo. E no por lesa ainda! Probechá uza buki di kualke idioma!
14. Bo no tin buki? Uza revista òf korant pa laga e yu mustra plachi i bisa kiko e ta mira.
15. Uza tempu di warda na dòkter òf otro kaminda pa konta e yu un kuenta lesa p’e òf sinta wak buki kuné. Bai tur kaminda ku un buki! |
